اورمو ایشچیلری :گونئي آزربايجان-دا گرچک سياسي گوج کيمدير؟ گونئي آذربايجان ميللي حرکاتيني گونئي آذربايجان سياسي حياتينا حاکيم سياسي حرکت اولاراق ايديعا ائده بيلريکمي؟ ايران ايچينده کي آذربايجان تورکلري نين سياسي داورانيش/رفتارلاريندا اؤز ميللي کيمليک و هووييتلري نه قدر تاثير قويور؟ ياشيل حرکاتي و ايران رئژيمي چاتيشماسي/توققوشماسيندا سسسيز قالان آزربايجان-ين بو سياسي رفتاريني اونون ميللي بيلينج/شوعورو اساسيندا آناليز ائتمه يه نه قدر حاقيميز واردير؟ بو آناليزلري هانکي
ايجتيماعي، سياسي و ايقتيصادي فاکتلارا دايانديريريق؟ ايران ايچينده کي آزربايجان تورکلري ايران سياسي حياتينداکي اصلی و اساسي تزادي/چه ليشکيني نه اولاراق گؤرورلر؟. اونلارين گؤزونده ميللي مسئله اساسي مسئله ديرمي؟ ميللي مسئله اونلارين اساسي مسئله سي اولدوغونو هاردان بيليريک؟ آزربايجان تورکلري نين ميللي شوعورو " فارس ميلليتچيليگي اولمادان ايران-دا دموکراسي اولماز " دييه جک قدر يوکسه ليبمي؟ نه يه داياناراق ايديعا ائديريک کي آزربايجان-ين بيرينجي مسئله سي اونون ميللي مسئله سيدير و ايقتيصادي، سوسيال و سياسي مسئله لري ايکينجي درجه لي اولاراق گؤروروک؟ باشقا بير سؤزله، گونئي آزربايجان-دا ياشايان تورکلري نه قدر تانييريق؟ اوغروندا موباريزه ائله ديگيميز آذربايجان تورکلري حاقيندا قاپساييجي تحليل/آناليزميز وارمي؟ يوخاريداکي سواللار سيزه شاشيرتيجي گله بيلر. آنجاق او سواللارا جواب وئرمه يه ن سياسي حرکتين نتيجه آلماسي او قدر ده آسان دئييل. بيز نتيجه آلماق ايسته ييريکسه اؤز ميللتميزي ياخشي تانيماليييق. ميللي حرکاتيميزين گوجونو، ايمکانلاريني و سينيرليقليلاريني (محدوديت) ياخشي بيلمه ليیيک. آزربايجان-ين شهر و کندلرينده نه قدر نوفوذوموز اولدوغونو دوغرو اؤلچمه ليیيک. هانکي ايجتيماعي/سوسيال صينيفلارين بيزيمله اولدوغونو دوغرو تشخيص ائتمه ليیيک. آزربايجان-ين اؤز ميللي کيمليک و هوويتي يولوندا نه قدر فداکارليق ائله مه قاپاسيته/ظرفيتي اولدوغونو اوبژکتيو اولاراق دگرلنديرمه ليیيک. آزربايجان-تورک ميلتي نين بيزدن نه گؤزله ديگيني و اونلارا نه وئرمهميز گرکتيگيني ديقتله آراشديرماليييق.
يوخاريدا بليرتديیيم مسئله لري نه قدر ديقته آليريق؟. دوغروسونو سؤيلمک گره کيرسه ديقته آلميريق. " بابام دئدي کؤر دئدي هر گلنه وور دئدي " منطيقييله موباريزه اولماز. ميللتيني تانيمايان سياسي حرکت- نه قدر نيتي ياخشي اولارسا دا اولسون- اؤز ميللتيني فلاکته آپاريب چيخاردار. گلينن نوقطه ده اؤز ميللتيميزي هر طرفلي تانيمايا احتياجيميز وار. بعضيلرميز " بيز تانييريق" دئيه بيلرلر، آنجاق، اونلارا دا دئمه لييم کي، تاسوفله تانيميريق. بيزيم هله ده گونئي آزربايجان-ين ايقتيصادي ايمکان و محدوديتلري حاقيندا سامباللي و ال ایله توتولور تحليليميز يوخدور. بيزيم هله ده اؤز ايچيميزده کي مذهبي آزليقلاريميز (اهل حق و سونيلر) حاقيندا نه ايستاتيستيک(آماري) فعاليتيميز وار نه ده اونلارلا نئجه رفتار ائده جه ييميز حاقيندا دموکراتيک برنامه ميز. تاسوفله بو ليسته ني سونسوزا قدر اوزاتماق مومکوندور .
دئيه بلرسينيز کي، بو ايشلر موتخصصلرين ساهه سي اولدوغو اوچون بونلار آراشديرماجيلارين گؤره ويدير. اوندا من ده سوروشارام کي، بس سياستچيلر نه ايشه يارارلار؟ بيزيم سياسي تشکيلاتلاريميزين ايشي نه دير؟. منه گؤره گونئي آذربايجان ميللي حرکاتينداکي تشکيلاتلار اؤز گؤره ولريني يئرينه گتيرميرلر. بوتون بو مسئله لري ايشيقلانديرماق اوچون کولکتيو چاليشمايا احتيياج واردير. کولکتيو فعاليتلر ده تشکيلاتلارين گؤره ويدير.
گونئي آذربايجان ميللي حرکاتي نتيجه آلماق ايسته ييرسه اؤز ميللتيني و او ميللتين ايچينده کي نوفوذ و محدوديتلريني تانيماليدير. اوسته ليک هر زاماندا گؤزلري ده او اينسانلارين اوستونده اولماليدير. اونلارين درد، سئوينج، اومود، آرزو و قورخولاريني ياخشي بيلمه لي. بيز اؤز ميللتيميزي گؤزلم له مه ليیيک، موشاهيده آلتيندا توتماليييق. بيزيم گؤزلميميز پليس و گوونليکچي گؤزله ميندن فرقلي اولمالي و آناليزچي گؤزويله باخماليييق. بيزيم گؤزله ميميزين نسنه سي (مفعول شناساييسي) ميلتيميزين کولکتيو تمايوللاري، آرزولاري، قورخولاري و گلهجک اوچون دوشونجه لري اولماليدير. بيز اؤز ميللتيميزين فارس ميلليتچيليگيندن، ايرانچيليقدان، مرکزيتچي گوجلردن و مرکزيتچي سياسي آخيملاردان نه اندازه ده قوپوب-قوپماديغيني بيلمه ليیيک و بو مسئله ني ده هر زامان گؤزلم آلتينا آلماليييق.
بو ايشلر تشکيتلارين وظيفه سي اولدوغو حالدا اونلارين بو ايستيقامتده فعاليت ائتمه نيتلري يوخدور. گؤرولدويو کيمين مسئوليت فردلرين اوستونه دوشور. بو ايش اوچون ميللي فعاللار اؤزلريني يئتيشديرمه ليديرلر. سياست، سوسيولوژي، ايقتيصاد، پسيکولوژي (روانشئناسي) و بين الخالق علاقه لر حاققيندا چيخان کيتاب و مقاله لري اوخوماق گره کير. زامانيميز آزدير. " هر کس اؤزونون مسئولودور" ايلکه/پرئنسيپي ايله عمل ائده رک آراشديرما و اوخوما فعاليتيميزه باشلاماليييق. کيتاب، مقاله و کيچيک يازي اولاسا دا بئله اوخوماغين اؤزو ده بير موباريزه اولدوغونا اينانماليييق. آراشديرماق اؤزو ده موباريزه نين اؤنملي پارچاسيدير. بو ايستيقامتده هر کس اؤزونو يئتيشديرمکله مسئول اولدوغونون بيلينجينده اولماليدير. بيز اؤز تئوريک بيلگيميزي ايلرلتمه ليیيک و بونونلا برابر اؤز ميللي ساهه ميز (گونئي آذربايجان) حاققيندا دا چوخ يؤنلو و اوبژکتيو بيلگي و معلوماتلارا صاحيب اولماليييق. بيزيم ميللي حرکاتيميزدا ضيالي يوخدور دئييرلر. ضيالي گؤيدن زنبيلله دوشومور کي. ضياليلار گئجه-گوندوز اوخوياراق يئتيشيرلر. اينسانلارين چوخو اؤز حياتلارييلا مشغول اولارکن اونلار اوخويورلار. او قدر اوخويور و دوشونورلر کي، اونلارين دا "روحلاري ترله يير " .
ايران رئژيمي اوچوروما دوغرو گئده رکن گونئي آذربايجان دا ياواش ياواش عصيانا حاضيرلاشير. بيز اؤزموزو حاضيرلاساق دا حاضيرلاماساق دا آذربايجان عصيان ائده جک. آذربايجان-ين عصياني بيزيم ايستک و ايراده ميزدن موستقيل اولاراق گرچکله شه جک. آزربايجان بيزي گؤزله ميه جک. گونئي آزربايجان عصيان ائدديگي زامان اونو ميللي حرکاتيميز رهبرليک ائتمه لي و ائده بيلمه ليدير.
اونا گؤره گونئي آذربايجان-ي تانيماليييق. اونو درينله مه سينه اؤيرنمه ليیيک. تمايوللاريني بيلمه ليیيک. اونا گؤره سؤزومو يئنه ده تکرارلاييرام: هر بير گونئي آزربايجان ميللي فعالي اؤزونو سياسي موتخصص کيمين يئتيشديرمه لي. بو "مومکون دئييل" دئمه يين؛ مومکوندور. ائدديگيميز هر تور تنبلليک و ضعيفليک ميللتيميزين ضررينه اولدوغونون بيلينجينده اولماليييق. تنبلليگي بيراخمالي و يولا قويولماليييق. آتالاريميز " گؤز قورخاق اولار آياق ايسه ايگيد " دئييبلر.
هیچ نظری موجود نیست:
ارسال یک نظر