اورمو ایشچیلری :
"بیزیم دوشونجه‌لریمیزین و دویغولاریمیزن دیلی بیزیم ان دگرلی وارلیغیمیزدیر. هرکسه کیفییتلی تعلیمی تأمینات آلتینا آلماق، قاتیلیمچیلیغی یوکسلدمک و آیریمچیلیغا قارشی قویماق اوچون چوخ دیللیلیک بیزیم یاردیمجیمیزدیر."
یونسکو گنل مودورو، ایرینا بوکووا
بین الخالق آنادیلی گونو –2012- موناسیبتی ایله باغلی بیانات
"بین الخالق آنادیلی گونو بیرلشمیش میلتلر تشکیلاتی تحصیل، بیلیم و کولتور قورومو عومومی کونفئرانسی نین (یونسکو) نویابر 1999’داکی اوتوروموندا اعلان ائدیلیبدیر (30C/62).
بیرلشمیش میلتلر گنل قورولو 16 مای 2009 تاریخلی قراریندا (A/RES/61/266) عضو اؤلکه‌لری ‘دونیا خالقلارینین
دانیشدیغی بوتون دیللری قورویوب ساخلاماغا’ چاغیریبدیر. عینی قرارلا، چوخ دیللیلیک و چوخ کولتورلولوک واسیطه‌سی ایله چئشیدلیلیکده بیرلیک و بئین الخاق آنلاییش آدینا، گنل قورول 2008 ایلینی ‘بین الخالق دیللر ایلی’ اولاراق اعلان ائدیبدیر.چوخ دیللیلیک ایله یاناشی دیل و کولتور چئشیدلیلیگینه قیمت وئرمک نامینه، فئورال 2000’دن بری بین الخالق آنادیلی گونو هر ایل گؤزلم آلتینا آلینیبدیر. بو تاریخ، 1952’جی ایلده بوگونکو بنگلادش اؤلکه‌سینین باشکندی اولان داکا شهرینده اؤیرنجیلرین آنا دیللری، بنگالجانین پاکیستاندا ایکینجی رسمی دیل اولماسی طلبی ایله گؤستری دوزنله‌ییب، پلیس طرفیندن آچیلان آتش سونوجوندا حیاتلارینی ایتیردیگی گونه موصادیفدیر.
دیللر مادی و معنوی میراثین قورونوب ساخلانماسینین ان گوجلو وسیله سیدیر. آنا دیللرین یایغینلاشماسی یؤنونده‌کی هانسیسا حرکت سادجه دیلسل چئشیدلیلیک و چوخ دیللی تعلیمین تشویق ائدیلمه‌سینه دئگیل، عینی زاماندا دونیا میقیاسیلی دیلسل و کولتورل عادت-عنعنه لر حاقیندا بیلینجلنمه‌نی گلیشدیرمک و قارشیلیقلی آنلاییشی تمل آلان دایانیشما، تولئرانس و دیالوگون تلقین ائدیلمه‌سینه خیدمت ائده‌جکدیر." [1]
یوخاریدا قئید اولونان سطیرلر چاغداش و مدنی دونیادا آنادیلینین یئری و اؤنمینی آچیق شکیلده اورتایا قویماقدادیر. دیلین سادجه بیر ایرتیباط قورماق وسیله سی دئگیل، خالقلارین "مادی و معنوی میراثلاری"نین قورونماسیندا باشلیجا واسیطه اولدوغو، کی بو بیر خالقین و میلتین وارلیغینی و یاشامینی دوام ائدبیلمه‌سی آنلامینا گلمکدیر، بیلیم دونیاسی طرفیندن کسین شکیلده قبول ائدیلیبدیر.
بو او دئمکدیر کی هر خالق و یا میلت دونیادا وار اولماق ایسته‌ییرسه و تاریخه قویلانماق ایسته مه ییرسه آنادیلینه صاحیب چیخمالیدیر، اونو قورومالیدیر و زامانین شرطلرینه اویغونلاشدیرمالیدیر. بونون ایسه ان تمل و واجیب گرگی او خالقین اوشاقلارینین آنادیلدینده تحصیل آلماسیدیر.
نه یازیق کی ایران آدلانلان اؤلکه سکسن ایلدن چوخدور بیر چوخ خالق و میلتین وارلیغینین مزارینا دؤنوشوبدور چونکو بو اؤلکه‌ده یاشایانلارین غالیب چوخونلوغونون دیلسل، کولتورل و مدنی میراثی بیلینجلی شکیلده اؤلومه محکوم ائدیلیبدیر.
البته کی بوتون بو خالقلار و میلتلر باشلارینا گلن بو بلانین بد‌لینی سادجه گله‌جکده یوخلوغا سوروکلنمکله دئگیل، بوگونکو اکونومیک، کولتورل، مدنی، سیاسی و ایجتیماعی گئری قالمیشلیق و ازیلمیشلیکلری ایله اؤدمکده‌دیرلر. و یئنه هئچ شوبهه‌سیز بونون سوروملوسو و سوچلوسو بو سورجی باشلادان و دوام ائتدیرن فارس شووئنیزمی و فارس تمللی ایرانچیلیق فیکری و سیستئمیدیر.
آزربایجان تورک میلتی باشینا گلنلری آرتیق آنلاییبدیر و بونا بیر "دور" دئمه گه قرار وئریبدیر. گونئی آزربایجانداکی تورک آیدینی و تورک گنجی آرتیق ایللردیر کی میللی مدنی وارلیغینی قورتارماق اوچون هر طرفلی بیر موجادیله باشلادیبدیر، دورمادان و اوسانمادان بو یولدا امک وئرمکده‌دیر و بد‌لینی ده اؤدمکده‌دیر. آزربایجان میللی حرکتی نین، کی بو حرکتین ان تمل ایستکلریندن بیریسی تورک دیلینین بوتون یؤنلری ایله رسمیته تانینماسیدیر، گونئی آزربایجانداکی تورک میلتی نین نزدینده دانیلماز و رقیبسیز بیر یئره صاحیب اولدوغونو آرتیق میللی وارلیغیمیزین دوشمنلری بئله قبول ائدیبلر.
ایرانداکی کؤهنه بئیینلی گئریچی-عیرقچی حاکیمیت و میلی ظولم قونوسوندا ان آز حاکیمیت قدر آنتی-دموکراتیک و چاغ دیشی بیر یاخلاشیم ایچینده اولان ایران موخالیفتی بیلمه‌لیدیر کی ایراندا سؤمورگه‌چیلیک و دیکتاتورلوغون زامانی سونا اریبدیر. ایراندا میلی ظولمه معروض قالان دیگر خالقلار کیمی آزربایجان تورک میلتی ده آرتیق اؤز موقددراتینا حاکیم اولماغا قرار وئریبدیر و بو حاقینی آلاجاقدیر.
آزربایجان میللی دیر‌نیش تشکیلاتی اولارق بئین الخالق آنادیلی گونونو بوتون میلتیمیزه و بو یولدا موجادیله وئرن هرکسه اؤزللیکله ده میلی حاقلاریمیز اوغروندا فارس شووئنیزمینین حبسخانالاریندا یاتان قهرمان وطن اؤولادلاریمزا تبریک دئییب تورک دیلی ده داخیل اولماقلا بوتون میللی حاقلاریمیزی گئری آلینجایا قدر مدنی و دئموکراتیک موجادیله‌میزه دوام ائده‌جگیمیزی بیلدیریریک.
آزربایجان میلی دیر‌نیش تشکیلاتی
گونئی آزربایجان
ز
[1] بيرلشميش ميلتلر تشکيلاتي رسمي وئب صحيفه سيندن عئينی ترجومه،
http://www.un.org/en/events/motherlanguageday/
هیچ نظری موجود نیست:
ارسال یک نظر