اورمو ایشچیلری : ديرلي يوردداشلار!
هر ميلتين تاريخينده درين ايزلر بوراخان و اونون تاريخي يادداشيندان هئچ بير زامان سيلينمه‌يه ن ائله بير حرکتلر و اونا اؤندرليک ائدن شخصيتلر اولموشدور کي، او ميلتلر ياشاديقجا اونلاردا ياشاياجاقلار.
وطنيميز آذربايجاندا خوررميلر حرکاتي و اونا باشچيليق ائدن اولو بابک ده ، او سيرالاردا اولان اونودولماز تاريخي شخصيت و ميللي قهرمانلاريميزدان بيريدير.
اولو بابک ین دوغوم گونو عرفه سيندگيک.تير آيينين 10-او(يولينين 2-سي) آذربايجانين بؤيوک قهرماني،ازادليق-برابرليک و عدالت جارچيسي،صداقت،جسارت و ايگيدليک سيمگه‌ميز اولان بابک ين دوغوم گونودور.بو قوتسال گون تورک ميلتيميزه قوتلو
اولسون.
سئويملي وطنداشلار!
بو گون آذربايجان سمالاريندا ائله بير اولدوز پارلاميشدير کي، اونون ساچديغي ايشيق تکجه آذربايجاني يوخ،بلکه اونون سرحدلريندن چوخ-چوخ اوزاقلاردا بئله پارلاميشدير.بابک،وطنيميز آذربايجاني عباسي عرب خليفه‌لرينين ايرقچيليغا دايانان ايشقالچيليغينا سون وئرمک اوچون،23 ايل اونلارين بو ايشقالچيليق و ظولمونه قارشي ميلتيميزي آياغا قالديريب و خيلافت قوشونلارينا قارشي باشلاتديغي آمانسيز موباريزه‌سينه بؤيوک باجاريق و فداکارليقلا دورمادان اؤندرليک ائتميشدير.
بابک،وطنين قورتولوشونو،ميلتينين سعادتيني،برابرليگيني و بوتون اينسانلارين قول و کؤله کيمي يوخ،بلکه تام سربست و آزاد ياشاماسيني هر ندن اوستون توتاراق يالنيز عباسي خيلافتينين ايشقالچيليغينا دئييل،عئيني حالدا ساپي اؤزوموزدن اولان بالتالارا قارشي و اينديده اولدوغو کيمي پول،مقام،ثروت،شؤهرت دوشکونلري اولان ساتقين آذربايجانليلار علئيه اينه ده موباريزه آپاريب،بؤيوک قلبه‌لر الده ائده‌رک يوردوموزو ياغي دوشمنلردن قورتارميشدير.
يوردسئور وطنداشلار!
تاريخ ائله بيل بو گونده تيکرار اولماقدادير.عرب قوشونلارينين آذربايجاني ايشقال ائتمه‌سيندن و بابک قيياميندان 1200 ايلدن آرتيق گئچسه‌ده،گرچک بودور کي،حاضيردا ايشقالچينين آدي دييشميشدير.يعني دوننکي عباسي خيلافتي يئرينده بو گون اونلاردان داها غدار،داها رهيمسيز و اوسته ليک اونلاردان داهادا قاتي ايرقچي اولان ايران ياخود فارس موستملکه‌چيلري اوتورموشدور.
بلي،بو گون هر کسه قوتسال و عزيز اولان آنا وطنيميز آذربايجان،باشدا ايران ايسلام رئژيمي اولماقلا فارس فاشيزمينين قانلي چکمه‌لري آلتيندا بير موستملکه اولاراق،اولدوقجا آجيناجاقلي و دؤزولمز بير دورومدا حيات موجاديله‌سي وئرمکده‌دير.
بو گون 30 ميليوندان آرتيق اولان تورک ميلتيميز،عئيني بابک چاغيندا اولدوغو کيمي، حتّي او دؤورودن بئله داها دا قات-قات آغير شرطلر آلتيندا تاماميله هاقسيز و حوقوقسوز،فارس شووينيزمينين بويون دوروغو آلتيندا قول و کؤله کيمي ياشاماغا محکوم ائديلميشدير.بئله بير ميسکين حيات،تاريخ بويو باش اوجاوه شرفله ياشايان و بؤيوک ايمپئرييالار يارادان همده ،زنگين مدنيته ماليک اولان اولو ميلتيميزه هئچ ياراشارمي!؟بو گون آذربايجان تورک ميلتي بئله بير دوروما سون قويماق اوچون يئنه ده آياغا قالخميشدير.او، ال-آياغينا باغلانان زنجيرلري هميشه‌ليک قيريب آتماق عزمينه گله‌رک،بوتون هاقلاريني الده ائتمک اوچون وار گوجويله اؤز هاقلي ميللي قورتولوش موجاديله‌سيني داوام ائتديرير.آذربايجان تورک ميلتي، اؤز گئچميشيندن درس آلاراق بوتون گوج و عزمي ايله اؤز شانلي و گرچک تاريخيني يئنيدن ياراتماقدادير.
سئويملي باجي قارداشلار،بو گون چؤکمکده اولان ايرقچي ايران ايسلام رئژيمي درين بير سياسي،ايقتيصادي و ايجتيماعي بؤهرانلارلا قارشي-قارشييا گله‌رک سون دوراغينا چاتميشدير.بو توتاليتئر و تئرورچو رئژيم اؤز اساسيني قان اوزرينده قويموشدور.اون مينلرله فرقلي سياسي دوشونجه و عقيده يه ماليک اولان سوچسوز اينسانلاري آغير و غئيري اينساني ايشکنجه‌لر آلتيندا و ياخود 10-15 دقيقه ليک گولونج محکمه‌لردن سونرا وحشيجه‌سينه اؤلدورن بو رئژيم،دونيانين ان غدار و سياسي باخيمدان ان هئيسيتسيز و رذيل رئژيملريندن بيري ساييلير.
بشريتين بؤيوک فداکارليقلار و قانلار باهاسينا الده ائتديگي دئموکراسي و آزادليق ايدييالارينا اساسدان قارشي اولان و دؤنه-دؤنه اونلاري لاغا قويوب تهقير ائدن بو رئژيم،بوتون اينسانلارين آماللاري اولان بو ايدياللارين تام ضيد مؤوقئعيينده دايانميشدير.مدني،سينفي و سياسي آزادليقلار ايران آدلانان اؤلکه‌ده تاماميله قاداغاندير.سياسي عقيده و دوشونجه باخيميندان اؤز دار چرچيوه‌لرينده اولان فاناتيک دينچي قروپ و قوروملاردان باشقا،بوتون سياسي قوروم و پارتيلرين فعاليتينه قاداغا قويولموشدور.
ايران آدلانان اؤلکه‌ده بوتون فارس اولمايان ميلتلر،اؤزلليکله تورک ميلتيميزي آغير باسقيلارا معروض قويان بو ايرقچي رئژيم 33 ايلدير کي،يالان وعدهلر،بوش و قورو سؤزلرله ياناشي،تام ديکتاتورلوق،زوراکيليق و جينايتکارليقلا اؤز قانلي قادالي حياتيني سوردورمکده‌دير.آغير و درين ايجتيماعي،ايقتيصادي و سياسي بؤهرانلار ايچينده چابالايان حاکيميت،حاضيردا سادجه آياق اوسته قالماق موجاديله‌سي وئرمکده‌دير. بو يالانچي رئژيم،حتّي اؤزونون يازديغي آنا ياساني بئله حياتا کئچيرمکدن قورخور.
اؤلکه‌ده حاکيم اولان بئله بير بؤهرانلي و گرگين دوروملا ياناشي،سون ايللرده آمئريکا باشدا اولماقلا قرب دؤولتلري طرفيندن ايران رئژيمينين آتوم سورونو ايله باغلي اويقولانان ايقتيصادي ائمبارقولار،سياسي بايکوتلار و پيسيکولوژيک ساواشلار،بو موستتملکه‌چي و فاشيست رئژيمي تام بير چيخيلماز دوروما قارشي-قارشييا گتيرميشدير.
اورتادوغودا،توتاليتئر رئژيملره قارشي"عرب باهاري"آدييلا عرب ميلتلرينين دئموکراسي اوغروندا آپارديقلاري موباريز،بؤهرانلار ايچينده اولان ايران رئژيميني داهادا قورخويا ساليب و بوداؤزلليکله گونئي آذربايجانين امنيتي بؤلگه ائلان ائديلمه‌سينه سبب اولموشدور.
عيرقچي فارس رئژيملري گونئي آذربايجاني اؤز موستملکه‌لرينه چئويره‌رک،ونون بوتون يئرالتي و يئروستو ثروتلريني تالاييب فارس اولان بؤلگه‌لره خرجله‌يير.آذربايجانين تبريز و بير ايکي شهري ايستيثنا اولماقلا،هئچ بير شهرينده بؤيوک فابريک و ايش يئرلريندن هئچ بير اثر-علامت يوخدور.ايشسيزليک اؤزلليکله گنجلروه اونيوئرسيتئت مأذونلاري ايچينده ايش يئرلرينين اولماماسي ندنيله حدسيز درجه‌ده چوخدور.آذربايجانلي عاييلهلر،ؤزلليکله گنجلريميزين بورادا هئچ بير گله‌جگي اولماديغي اوچون،ؤز کند و شهرلريني يني آتا-بابا يوردلاريني ترک ائتمک مجبوريتينده قاليب،يش و بير تيکه چؤرک اوچون اؤز جنّتيميزي بوراخيب،فارس شهرلري و جهننم ساييلان چؤللوک بؤلگه‌لرينه کؤچورلر.بئله‌ليکله‌ده کند و شهرلريميز بوشاليب و خارابازارليغا چئويريلير.آذربايجان تورکلري اؤز ابدي و ازه‌لي آتا-بابا يوردلاريندان کؤچدوکده ، ايرقچي و موستملکه‌چي فارس رئژيمي کوردلري آذربايجانين باتيسيندا اؤزلليکله‌ده اورمو،سالماس،سولدوز،ماکي،تيکان تپ،سايين قالا و باشقا شهرلرده آچيق و پلانلي شکيلده يئرلشديرمکده‌دير.بو رئژيم آذربايجانين باتيسينداکي ميللي ترکيبي کوردلرين خئيرينه دييشمکله ، اوزون سوره‌ديرکي،وطيميزين بو بؤلگه‌لرينده کوردلشديرمه سيياستي آپارماقدادير.يني آچيق دئسک،قاتي تورک دوشمني اولانيران ايسلام رئژيمي،نئچه ايلدير کي تئرورچو کورد تشکيلاتلاريني دستکله‌ييب،ونلارايارديم ائتمکله آذربايجان تورکلرينه قارشي قانلي بير سئنارييو حاضيرلاماقدادير.موستملکه‌چي فارس حاکيميتينين ائتديگي بو جينايتلر يئتمه‌ييب دئي،عئيني حالدا بيله‌رکدن اورمو گؤلونو مقصد يؤنلو قوروتماقلا دا مشقول اولوب و اينسانليغا قارشي عاغيلا سيغمايان جينايتلريلآذربايجاني هميشه‌ليک يئر اوزوندن سيلمک نيتينده اولموشدور.
بيزيم دوشونجه‌ميزه گؤر،چاغيميز بوتون ظولم آلتيندا و موستملکه اولان ميلتلرين قورتولوش چاغيدير.دونيانين دؤرد بير بوجاغيندا موستملکه‌چيلييه معروض قالان ميلتلر اؤز هاقلاريني الده ائتمک اوچون آياغا قالخيب،جيدي شکيلده موجاديله وئرمکده‌ديرلر.آذربايجان تورک ميلتيده دونيانين باشقا زنجيرده اولان ميلتلري کيمي آزاد و اؤز گله‌جگيني اؤزو بليرله‌مه نيتينده‌دير.او،بوتون هاقلاريني الده ائتمک،اسارت زنجيرلريني قيرماق،نه تهر ياشاديغيني و طالعييني اؤزو بللي ائتمک ايسته‌يير.بو هر ميلتين دوغال حاقيدير و دونيانين هئچ بير گوجو بو قوتسال ايسته‌يه مانه اولا بيلمه‌ميشدير.
بو گون هر بير شرفلي و غئيرتلي وطن اؤولادي آذربايجانين چيخارلاريني اؤز شخصي و منسوب اولدوغو تشکيلات و قوروملارين چيخارلاريندان اوستون توتاراق،يالنيزوطنيميز و تورک ميلتيميزين معنافئي نامينه و اونون خوشباخت گله‌جگي اوچون بيرلشمه‌ليدير.بو هر کسين بوينونا دوشن انساسي ايش و آجيل وضعيفه‌دير و هر کسدن ده بؤيوک بير مسئوليت طلب ائدير.
آذربايجان ميللي حرکاتي تاماميله موستقيل،دئموکراتيک و مدني بير حرکاتدير و نئجه کي عملده‌ده ده گؤسترميشدير،ايران آدلانان اؤلکه‌نين هئچ بير مرکزيتچي پارتي،قوروم و ايران آدلي حرکتلرله هئچ بير ايلگي و ايليشگيسي يوخدور.بو گون آذربايجان تورک ميلتي،ميللي شوور باخيميندان اؤز گليشمه‌سيله ميلت-دؤولت سوييه‌سيني باشا وورموش و ميللي گلوبال دوزن قايدا قانونلارينا اويقون اولاراق مودئرن و چاغداش ميلت و دؤولتلرله چاغيميزا اويغون دوزگون علاقه لريني قورماق ايسته‌يير.
بوتون بو قوتسال آماجلارا اولاشماق و اونلاري الده ائتمک اوچون قارشيميزدا دوران ان واجيب و اساسي شرطلردن بيريده تشکيلاتلانماقدير.بيرلشيب و تشکيلاتلانمادان، هئچ بير ايش گؤرمک مومکون دئييل.هر بير وطن سئور آذربايجان تورکو اولدوغو هر يئرد،ايشله‌ديگي هر ايداره و يا فابريکادا،اوخودوغو هر اوخول و اونيوئرسيتئتده، ياشاديغي هر بير محلله و ياخود کندده بير-ايکي فيکيرداشييلا بيرليکده سئچديگي و بينديگي هر پارتي و قورومون هسته‌لريني قوروب و اونلارلا علاقه ياراتماليدير.
آذربايجانين بؤيوک قهرماني اولو بابکي ميزين دوغوم گونو عرفه سيند،بو آجيناجاقلي دوروما سون قويوب،وطنيميزي،ميلتيميزي بو اسارت و فارس فاشيزمينين موستملکه‌چيليگيندن قورتارماق اوچون ال-ال،چيگين-چييينه اؤز ميللي قورتولوش موجاديله‌ميزي دورمادان داوام ائتمه‌ليگيک.
بيز وطن اوغروندا،ميلت يولوندا ايييجه دؤيوش و موباريزه‌ني اولو باباميز اولو بابکدن اؤيرنمه‌ليگيک.
بيز آشاغيدا آدي گئدن پارتي و قوروملار،بابکين دوغوم گونو موناسيبتيله بوتون تورک ميلتيميزي اورکدن قوتلاييب و اونون فارس موستملکه‌چيليگينه قارشي و اؤز اينساني و هاقلي اؤلوم-قاليم موجاديله‌سينده بؤيوک باشاريلار و اوغورلار ديله‌ييريک.
عشق اولسون وطنيميزين آزادليغي اوغروندا تؤکولن موقدس قانلارا!
ياشاسين آذربايجانيميزين قورتولوشو يولوندا برابرليگيميز و بيرليگيميز!
1- آذربايجان سوسيال دئموکرات پارتيسي(گونئي)- آسپ(گونئي)
2- آذربايجان اؤيرنجي حرکاتي!- آزوح
3- گونئي آذربايجان دئموکرات پارتيسي!- گادپ
4- گونئي آذربايجان تورک ديرچه‌ليش تشکيلاتي
5- واحيد موستقيل آذربايجان جبهه سي!- وماج
6- يئني گونئي آذربايجان ميللي اويانيش حرکاتي!- يئني گاموح
هیچ نظری موجود نیست:
ارسال یک نظر