اورمو ایشچیلری :سونوندا قوزئي آذربايجان رسمي‌لرين‌دن گرچک آدديما شاهيد اولدوق، اؤلکه‌نين آديني گرچک اولدوغو کيمي دئييشديرمک، آذربايجان و آذربايجانليلار اوچون قاپسام‌لي ياناشمايا زمين حاضيرلايان سئچيمين ياپيلماق ايستکي ميللي مجلیسه گؤندريلدي.قودرت حسنقلیو آدلي ميللي مجليس نماينده‌سي اؤز لايهه‌سينده، آذربايجان رئسپوبليکاسي اولا‌راق دونيادا تانينان اؤلکه‌نين آديني قوزئي آذربايجان رئسپوبليکاسي اولا‌راق قبول ائتديرمک طلبي اؤنه سورولموش‌دور.بو آدديمدا اصلينده بير چوخ‌لو يارار و بير نئچه تهلوکه واردير.بيرينجي و ان اؤنم‌لي‌سي بودور کي بو لايهه‌نين آماجي ندير و ندن بو دؤنمده اؤنه سورولموش‌دور؟ جناب حسنقلیوي تانيمايان ميللي فعال يوخ‌دور سانيرام، اونون ميللي دوشونجه‌سي و گونئي درديله تانيش اولدوغو ايللردير کي گوندمي قاپساميش‌دير، بونا گؤره‌ده بير چوخ‌لو تضييق‌لره معروض قالميش‌دير. سؤزو گئدن لايهه‌نين محض جناب حسنقوليئو طرفين‌دن اؤنه سورولمه‌سي ايستر ايستمز بونو گؤسترير کي ايستکين آرخاسيندا گوج‌لو آراشديرما‌لار و ايللرجه دارتيشما دايانميش‌دير. دئمه‌لي، لايهه‌نين اؤنه سورولمه‌سي گونئي‌لي
فعال‌لارين ۱۰ ايللرجه اؤنجه‌دن طلبي‌نين اتکي‌سيني گؤرمکله، قوزئيده اويانان ميللي هيس‌لري، هابئله اؤزگور سياست گوجونه ماليک اولما سورجينده اولماسينيدا گؤسترير. ايکينجي اؤنم‌لي قونو ايسه بودور کي بير اؤلکه‌نين آدي‌نين ديشديريلمه‌سينده کيم‌لرين و هانسي اورقانالرينا راضي‌ليغي آلينما‌لي اولا‌جاق‌دير. اولوسلاراراسي نورما‌لاردا بير اصل واردير، اؤلکه‌لرين وطنداش‌لاري اؤزلرينه نه آدي وئرمکده تام موختاريت داشيماقدا‌ديرلار. ياني، باشقا اؤلکه‌لر (بللي دوروم‌لاردان خاريج) و اولوسلاراراسي هؤرگوت‌لري ايلگيلنديرمه‌دن، بير اؤلکه اؤز آديني آناياسايا و ميللي رئفئرئندوما اساساً دئييشديره بيلر. نورمالده آد دئييشيمي دئوريم و يا ايشقالدا، يادا موستقيل‌ليک قازانماقدا باش وئرر، آنجاق، معلوم‌دور کي اؤلکه‌نين داخي‌لي ايشلري ساييلان ترورلا ايلگي‌سي اولمايان هر بير آدديم داخي‌لي ايش اولا‌راق باشقا اؤلکه‌لري ماراخلانديرماما‌لي‌دير.
اوچونجو اؤنم‌لي قونو ايسه بودور کي سؤزو گئدن لايهه‌نين قازاناجاغي هانسي سويه‌ده اولا‌جاق‌دير. اگر قوزئي آذربايجان حاکيميتيني، ابولفضل ائلچيبي‌دن سونراکي اؤزل‌ليکله، تانيساق، بيلريک کي بو هاکيمکيتين ميللي دوشونجيله هئچ بير علاقه‌سي يوخ‌دور، آز يئتکي‌لي ايسه بو دوشونجني سرگيلمک‌دن قورخورلار. موخاليفتي تانيديغيميز ايسه، گوج‌سوز و گئنيش باسقييا معروض قالان بير آزين‌ليقلا قارشي اولدوغوموزو بيليريک. اگر بو لايهه موخاليفتين طرفين‌دن اؤنه سورولموش‌دورسه، اونون ميللي مجليسده، کي ايلهام اليئوين پارلماني اولا‌راق تانينار، قازاناجاغي او قدرده گؤزلنيلن ديل‌دير. اوزونتولودور، آنجاق گرچک بودور کي حاکم پارتي چاليشير اؤز اقتصادي ماراخ‌لاريني قوروسون، اقتصادي ماراخ‌لاردا ايسه ميللي سياسته يئر وئريلمز! اگر موخاليفتين اؤنه سورولن لايهني مودافييه ائديب قازان‌ديرا بيله‌جک گوجو اوللا‌جاق‌ديرسا، قوشقوسوز بونا باشقا پارتيلر و اؤزل‌ليکله‌ده خاريجده ياشايان گونئي‌لي فعال‌لارين دستکي لازيم اولا‌جاق‌دير.
دؤردونجو اؤنم‌لي قونو ايسه ايرانا دلانان بير اؤلکه‌نين وار اولماسي‌دير! دوغرودور، يوخاريدا دئديگيم کيمي، قوزئي آذربايجان داخي‌لي ايشلري باشقا اؤلکه‌لري ماراخلانديرماما‌لي‌دير، آنجاق، لايهني اؤنه سورن‌لر و اوندان فايدالانماق ايسته‌ين‌لرين آماجي بونون ترسيني گؤسترير. منجه، سياسي باخيم‌دان چوخ گوج‌لو اولا بيلجگيميز آلاندا گوجسوزلوک سرگيليريک. بئلکي، قوزئي آذربايجاندا داخي‌لي ايشي، تاريخي بير گرچگي و اولوسلاراراسي نورمال آدديمي ايرانا يؤنه‌ليک بير سال‌ديري اولا‌راق رکلام ائديرلر! بو رکلام‌لارا ايمکان يارا‌دان‌لار ايسه اصلينده بيزيم دوست‌لاريميزديرلار! سؤزو گئدن لايهه‌نين آذربايجان بوتؤو‌لوگونو قورخونج حالده آچيقلايا‌راق، اونو رسمي شکيلده ايران آدلانان اؤلکه‌يه قارشي بير محاربه کيمي تانيتماقدا‌دير. و بوردا‌دير کي بيزيم حاق آدديم‌لاريميز “باشقا اؤلکه‌نين داخي‌لي ايشلرينه دخالت ائتمک” کيمي رد ائتديربيله‌جک‌دير.
بئشينجي اؤنم‌لي قونو ايسه بودور کي ايران آدلانان اؤلکه اونسوزدا آذربايجان آدين‌دان قورخماقدا‌دير، داها دوغروسو نفرت ائتمکده‌دير و بونو ايللرجه سرگيلميش‌دير. سون ايللرده اؤزل‌ليکله قوزئي آذربايجان، دين و باتي مسئله‌سيني بهانه ائده‌رک، رسمي شکيلده و قئيري رسمي کانال‌لاردان قوزئي آذربايجانا سال‌ديري‌لار دوزنلنميش‌دير. اونودماياق کي، قوزئي آذربايجان ايرانلا علاقه‌ده ۴ اؤنم‌لي باغيم‌لي‌ليق‌دان آجي چکمکده‌دير، ۱- ناخچيوان، ۲- قاراباغ، ۳- خزر و ۴- گونئي آذربايجان. بون‌لاردان آسيلي اولان ايسه بير چوخ‌لو باشقا راحت‌سيزليق‌لار، ائرمنيستانلا علاقه‌لر اؤرنيين، وار اولماقدا‌ديرلار. دئمه‌لي، بون‌لاري بيله‌رک‌دن اؤنم‌سيزلمک، و ايران ادلانان اؤلکه‌يه قوزئي آذربايجان‌دان رسمي سال‌ديري دوزنلمک نه اولان بير ايش و نده حاکيميتين ايستکي اولا بيله‌جک‌دير.
آلتينجي اؤنم‌لي قونو، و منجه سؤزو گئدن لايهه‌نين قازانماسينا يول آچان قونو، مسئله‌ده ايران آدلانان اؤلکه ني و اوندان يولا چيخا‌راق روسيه ني سالديرييلا حده‌لمه مک‌دير. ائرمنيستانلا ذاتاً تورپاق ساواشي چؤزولمه ميش‌دير!
بونا ترس آنلاشما‌لارين اولماماسي اوچون بئله ايضاح گتيرمک ايستدريم کي، قوزئي آذربايجانين آدي‌نين ديشديريلمه‌سينده ساده‌جه و ساده‌جه تاريخي و ميللي فاکت‌لارا يئر وئريلمه‌لي‌دير. بئلکي، آذربايجان بير بوتؤو اولا‌راق پارچالانيب، ايندي ايسه آراز چايي‌نين قوزئي طرفين‌دکي بؤلوم، تومو اولمازسا بيله، موستقيل اولموش‌دور. باشقا تورپاق‌لاردا ياشايان عيني ايرق، کولتور و ديله ماليک اولان آذربايجانليلارا خيانت ائتمه مک اوچون، اونلارين “اؤز موقددرات‌لاريني تعين ائتمه حاق‌لاري”نا سايقي‌لي قالماق اوچون، اونلاري آسيميله‌يه قوربان وئرمه مک اوچون، حاق‌لاريني دونيادا ايشيقلانديرماغا ياناش‌ديرماق اوچون و تاريخي بير سهوه دوزليش وئرمک اوچون، لازيم گؤرونور کي آذربايجان رئسپوبليکاسي آدي قوزئي آذربايجانا چئوريلسين. اونودماياق کي ايران ادلانان اؤلکه‌ده بيله آذربايجان تورپاق‌لاري پارچالانيب و قومشولارا وئريليب!
دوغرودور، بو ايزاهاتين نقدر يئترلي اولدوغو اوخوجولارا باغلي‌دير، آنجاق اينانيرام کي بو دؤنمده، حاق بير ايستکي بير سيرا اؤنم‌لي قونولارا گؤره سوس‌دورماق اوچون چوخ گوج‌لو ايشلم‌لر آپاريلماقدا‌دير. بو ايشلم‌لري يوخا چيخارديب، اتکي‌لريني آزالتماق اوچون، لازيم‌دير کي دقتله چاليشاق.
يئددينجي قونو ايسه بودور کي قوزئي آذربايجاندا بعضي آدديم‌لار آپاريلميش‌دير کي او اؤلکه ني تام آنلاميندا يئقانه آذربايجان اولا‌راق ساخلاسين‌لار. بونا اؤرنک، قاراباغ مسئله‌سينده گونئي آذربايجانين مواميله قونوسونا چئوريلمه‌سي، آذري تورکجه‌سي ورينه آذربايجان ديلي اورتيلمه‌سي، و آذربايجانلي کيم‌ليگيني آذري تورکون‌دن آييرماسي، هابئله دونيا چاپيندا آذربايجانليلار آدينا ساده‌جه و ساده‌جه قوزئي‌لي‌لرين ماراخ‌لاريني قوروماق (ميللي ثروت‌لردن ماليه‌لشن، آنجاق سولاله‌نين رکلام ماکينه‌سي اولان حيدر اليئو فوندو) سايماق اولا‌جاق‌دير.
آما، فايدا‌لي اولان و هئچ بير زامان اونودولمايان بودور کي، قودرت حسنقلیو ايللرجه آرزولاريميزي رسمي شکيلده قوزئي آذربايجان رسمي‌لرينه بيلديرميش‌دير، اوتايدا و بوتايدا، هابئله خاريجده بو آدديمين آتيلابيله‌جک اولدوغونو گؤسترميش‌دير و بنزر آدديم‌لاريندا آتيلاجاغينا زمين هازيرلاميش‌دير. بئله‌ليکله، چاليشاق کي اؤنه سورولن لايهه‌نين يول‌دان جايديريلماسينا ايمکان وئرميک و دوشمانا فورسات ساغلاماياق.
و، اونسوزدا ايران يئتکي‌لي‌لري يئني‌دن “گولوستان” و “تورکمانچاي” موقاويله‌لري‌نين باتيل ائديلجگيني اؤنه سوره‌جک‌لر و بو مسئلني ميللي مجليس‌لرينه قال‌ديرا‌جاق‌لار، بوراخين بو ايشي گؤرسون‌لر، چونکو، آدي گئدن موقاويله‌لر فارس رئژيميله يوخ، کي قاجار ايمپاراتورو ايله ايمضالانميش‌دير، قاجارلار ايسه آذري تورک دؤولتچي‌ليگي‌نين واري‌سيدي‌لر، کي اونلارادا آذري تورک آتابابالاريندان قالميش‌دير. بئله‌ليکله‌ده، سانيرام دوشمانين آتاجاغي داش اؤزونه قاييدا‌جاق‌دير و سياسي اوزمان‌لاريميز بو موقاويله‌لرين نه اولدوغونو و نئجه گوجده قاليب يادا باتيل اولماسيني رسمي شکيلده آچيقلايا بيله‌جک‌لر.
سانيرام قوزئي آذربايجان گوندمي بير بيرينه ديه‌جک‌دير، گئچيجي اولسا بيله، هر بير آدديم کي بوتؤو آذربايجان نامينه آتيلماقدا‌دير تاريخه يازيلير، اويانيش يارا‌دير و اتکي‌لري، تپکي‌لري آشکارلان‌ديرا‌راق چوخ‌لو حقيقت‌لري آچيقلايير. بو واسطه ايله‌ده قودرت بئيه تشککورومو بيلديريب، اونون داها دقت‌لي و داها گوج‌لو اولماسيني آرزو ائديرم. دوغرودور، قوزئي و گونئي بيربيريله چوخ فرق‌لي‌ديرلر، آنجاق، بونا ندن اولان آيري‌ليق آرا‌دان قالديريليرسا، طبيعي کي بير سوره‌دن سونرا عيني ده يرلريميزي منيمسيجييک، چتين اولا‌جاق، آنجاق اولا‌جاق‌دير.
و بيرده، لايهه اؤنه سورولموش‌دورسه، اوندادا اؤز ديليميز ايشه آلينما‌لي‌دير. شيما‌لي يئرينه قوزئي يازيلما‌لي‌دير، قوزئي و گونئي کيمي آنلام‌لي و ميللي کليمه‌لريميز واردير، شيما‌لي سؤزجوگونو قوللانماق و بير تورک اؤلکه‌يه رسمي آد سئچمک يانليش‌دير.
بوتؤو آذربايجان بير گرچک‌دير، ياشايا‌جاق‌دير
تبريزلي باي بک
۱۵/۰۱/۲۰۱۲
کرويدون
پ.س:
خاتيرلاييرام قودرت حسنقلیو اؤتن جمهورباشخاني سئچکي‌لرينده اؤنه سوردوگو پلاتفورمدادا اؤلکه‌نين آدي‌نين دئيشيله جگيني وورقولاميش‌دير.
هیچ نظری موجود نیست:
ارسال یک نظر