یاخلاشیق
ایل یاریم اؤنجه "سورگونده گونئی آذربایجان (ایران) قلم انجومنی"نین
قوروجو هئیتینده یئر آلدیغیم ندنی ایله، سون زامانلاردا بعضی دوستلار
ایمئیل و یا تئلفون آراچیلیغی ایله، انجومنین سیاسی گؤروشلری و منیم
موناسبتیم حاقیندا مندن سورولار سوروب، آچیقلامالار ایسته میشلر.
"سورگونده
گونئی آذربایجان (ایران) قلم انجومنی"نه یازدیغیم استعفا مکتوبونو
یایینلایاراق، هم او دهیرلی دوستلار و هم ایچلرینده سورو ایشارتی اولان
باشقا آرخاداشلارین سورلارینی یانیتلامیش اولاجاغام دئیه اومورام:
"سورگونده گونئی آذربایجان (ایران) قلم انجومنی"نین باشقانی، سایین دوکتور صدیقه عدالتی،
بونونلا، گؤردویوم گره ک اوزه رینه، "سورگونده گونئی آذربایجان (ایران) قلم انجومنی"نین اویه لیک و قوروجو اویه لیییندن
اوزولهرهک چکیلمک ایستهدیییمی بیلدیریب، استعفامی قوللوغونوزا سونورام.
استعفاما ندن اولان بعضی خصوصلار بونلاردیر:
- قلم
انجومنینین چئشیدلی شخصلر طرفیندن یازیلان حاقلی-حاقسیز تنقید /
اله شتیرلره اولان یاناشماسی شوبهه گئده ریجی دئییل بلکه داها چوخ محکوم
ائدیجی بیر بیچیمده اولموشدور. قوروجو اویه لرین بیرینین استعفا مکتوبونا
یانیت اولاراق یاییلان بیر یازیدا، نزاکتدن اوزاق خصوصلار بئله
گؤرولموشدور.
- قلم انجومنینده سوروملولوق داشییان اویه لر انجومنی ساوینماق آدینا
یایدیقلاری یازیلار و - انجومن طرفیندن کئچیریلن پالتاک - دانیشیقلاریندا
انجومنی تنقید ائدنلری ایقناع ائتمک شکلینده دئییل اونلاری ایتیهاملاماق
بیچیمینده چیخیش ائدیرلر. اوزوله ره ک، بو ایتیهاملارین بیر چوخو
پان-ایرانیست گوجلرین یازیلاری و سیاسی محبوسلاریمیزا قارشی وئریلن محکمه
قرارلاریندا گؤرولن پان-تورکیسم، تورکیسم، قؤومیتچیلیک/Ethnocentrism کیمی سؤزلری صرف ائده ره ک ایره لی سورولموشدور.
-
توپلومون یازارلار، شاعیرلر و ژورنالیستلرینی تمثیل ائدن بیر قورومون بللی
بیر سیاسال و اینانجسال گؤروشو تمثیل ائتمه مه سی و عئینی زاماندا چئشیدلی
دوشونجه لری ایچینده باریندیرماسی گرکمکده دیر. آنجاق "سورگونده گونئی
آذربایجان (ایران) قلم انجومنی"نین گونئی آزربایجان توپلوموندا سرگیله دییی
گؤرونتو هارداسا بوتونلوکله بونون ترسینه اولموشدور و بو گؤرونتونو
ده ییشدیرمک و یا اونارماق اوچون انجومن طرفیندن هر هانسی بیر ایراده
اورتایا قویولمامیشدیر.
سایغی ده یه ر صدیقه خانیم عدالتی،
گونئی
آزربایجان یازارلاری آدینا بیر قورومون بوشلوغونو گؤردویوم اوچون،
یاخلاشیق ایل یاریم اؤنجه "سورگونده گونئی آذربایجان (ایران) قلم
انجومنی"نین قوروجو هیئتینه قاتیلما تکلیفینی قبول ائدیب و بو انجومنین
قورولماسییلا فرقلی دوشنجه لردن اولان قلم صاحیبلری بیر آرایا گله جک و گنج
یازارلاریمیز دستکلنه جک، دئیه اومودلانمیشدیم. آنجاق، اوزوله ره ک عئینی
بوشلوغون هله ده وار اولدوغونا اینانیرام.
بئله
بیر بوشلوغون دولماسینی و چئشیدلی دوشونجه لری باریندیران، اینانج
اؤزگورلویونه اینانان، تورک دیلی و کولتورو و ائله جه ده آزربایجان
میلتینین پارچالاری اولان باشقا ائتنیک قروپلارین دیللری و کولتورلرینی
تانیتماق و یاشاتماغی آماجلایان بیر قورومون یارانماسینی آرزیلایاراق سیز و
قلم انجومنینده چالیشان امکداشلارینیزا باشاریلار دیله ییرم.
سونسوز سایغیلاریملا
علیرضا قولونجو
3 أکیم/اوکتیابر 2012
ونکووئر، کانادا
هیچ نظری موجود نیست:
ارسال یک نظر