اورمو ایشچیلری : میللی حرکتین آفت لری و خاریجی اؤلکه
لرله ایلیشگی :
خیاوان نوماییش لری ، اعتراض لار و کوچه
و خیاوان لاردا اولان تظاهورات میللی حرکتین ان گوزه چیرپان و قورخولو تپکیسیدیر.
بابک حرکاتیندان سونرا 2006 خورداد قیامی و اورموگولو قوروتولماسین سیلسیله حرکات
لاردا خیاوان داکی خالقیمیز اؤز ایسته ک لرین شوعارلار و سلوقانلاریله ایبراز
اتمیشدیر. تراختور فوتبول تیمینین هر اؤیونون دادا میللی شوعارلار ان بویوک ایمکان
اولاراق میللی حیسین خالقیمیزین قانی و جانینا رسوخ اتمه
سین ساغلامیشدیر. هارای
هارای من تورکم ، تورک دیلینده مدرشه اولمالیدیر هرکسه ، اورموگولو جان وریر مجلیس
اونون قتلینه فرمان وریر ، یاشاسین آزه ربایجان ، آزه ربایجان وار اولسون ایسته
میه ن کور اولسون و بونلارا نظیر شوعارلار یرینده و چوخ اونملی مساژلار هم
ایران حاکمیه تینه و هم مرکزچی سانترال اپوزوسیونا ورمیشدیر.
لاکین دونیا اؤزرینده و راییج سیاسی
ادبیاتا اویقون اولمیان و بعضن فاشیستی و شوونیستی شوعارلار وریلیب . بو شوعارلار
اولابیلر ایران اطلاعاتی طرفیندن و یا ایچیمیزده اولان لومپن و اؤزونو بیلمیه ن
اینسان لاریندا طرفیندن مطرح اولسون . بو شوعارلار هم بیزی دونیا گوزلری اؤنون ده کوچوک
دوشوره بیلر و هم بیزی محکوم اتمه یه و دوشمانلاریمیزا یئته رینجه مالزمه چیخاردا
بیلر. بیز بو شوعارلاری ورنلرین قاباغیندا بوگون دورماساق گله جک ده بیر
قورخویارادان ، باسقی اهرومون باشیمیز اوسته گوره جییک . میللی حرکتین مونحریف
اتمک ایسته یه ن لومپنلر بوزقورد و یا بنزری حرکت لر و شماییل لر آلتیندا انصار
حزب الله و بسیج قاوراملاریلا بیزه ایستیلا ائدرلر.
فارس دیلی ایت
دیلی ، اؤلوم اولسون فارس لارا ، باکی – تبریز – آنکارا بیز هارا فارس لار هارا ،
کورد – فارس – ارمنی آزه ربایجان دوشمنی کیمین شوعارلار بیزی
یولدان ساپدیریب و دونیا ایجتیماعاتی گوزونده فاشیستی حرکت لر گوسته ریر. بیزیم
فارس لا یوخ بلکه فارس شوونیسم و فاشیستیله دوشمانلیقیمیز وار بیز دمه لییک اؤلوم
اولسون پان ایرانیسمه ، اولوم اولسون (فارس ) فاشیسمینه . بیزیم کورد خالقیلا دئییل بلکه تروریست کورد
قروپ لاریلا سورونوموز وار. اونلارین بیزیم توپراقلاریمیزدا ترور استریب و توپراق
لاریمزا گوز تیکمه له ری بیزی ناراحات ائدیر ، بو اوزدن کورد خالقینا توخونماق
یرینه کورد تروریسمی قهر اولسون شوعارین وره ک. باکی – تبریز – انکار
بیرلیک ده گوجلویوک بیز شوعاری راسیستی شوعارلارین یرینه قویولمالیدیر. بونلار
اینجه و دوغرو نوکته له ردیلر و میللی حرکتین میدان ، کوچه و بازار حرکتین ده بیزی
دوغرو تمثیل ائدیب و دوشمانلاری خلع سیلاح ائدر، یوخسا بیزی فاشیستی بیر حرکت
اولاراق نوماییش وریب یئته رینجه مالزمه دوشمانلارین الینه وره بیله ریک . سولچو و
خالق ایچینده یانداشی اولمیان یالان دان آذربایجانچیلار اؤزلرین مووجه گوسته رمک اؤچون بو شیوه لردن چوخ ایستیفاده ائدیب و
بو شوعار و سویلم لری عوثمان کوینگی ائدیب بیزه قارشی دوروللار. بو نوکته لره اؤنم
وریب و دوغرو یول دا حرکت اتسه ک داها اویقون و داها راحات مقصده چاتا بیله ریک .
میللی حرکت و خاریجی ایلیشگی لر:
1.شومالی آزه ربایجان جمهورییه تی و تورکیه
جومهورییه تی ایله ایلیشگیلر: 1825دن بری آزه
ربایجانین تاریخی اراضیسی بولونوب و میلتیمیز پارچالانیب دیر. تاریخی اراضیمیز
بوگون ایران ، شومالی آزه ربایجان ، ارمنیستان ، گورجیستان ، روسیه و تورکیه دولت
لرینین حاکمییتی ایچینده یر الیر. 3عصره یاخیندیر حسرت ادبیاتی و په ش په شه گلن
اوغورسوزلوق لار و سوی قیریم لارا معروض قالمیشیق. شومال و جنوب حیصه سینده آیری
یاشاماق و موختلیف سیاسی و دینی حاکمیت لرین بیزه حوکوم سورمه سی بیر میللتین
ایکیه آیریلمیش قانادلارین یادیرقامیش وضعیته گتیرمیش دیر. سیاسی ادبیات و عورفا
دایاناراق بوگون هر نه قه در بونا قارشی اولساق دا شومالی آزه ربایجان جمهورییه تی
، ائلیه بیلمه ز ایرانین ایچ ایش لرینه
قاریش سین و هر بیر مسئله یه تبکی گوسته ر سین . همین دئولت بویوک و کوچوک اونملی
سورونلارلا ال به یاخادیر و ایران دئولتی ده گوسته ریب دونیا قایدا و قانون لارینا
سایقیلی دئییل و هر آن ائلیه بیلر ترور واسیطه سی و چشیتلی یول لارلا بویوک ضربه
لر شومالی آزه ربایجانین استیقلالیت و حوررییتینه وورسون . بو نلاری نظره آلاراق
میللی حرکت و اونون بونیه سینده اولان تشکیلات و قورولوش لار ، همچنین میللی فعال
لاریمیز گره کیر داها تمکین لی اولاراق بیر موخالیف پارتیا کیمی دئیل بلکه بیر
دوست و هم درد کیمی اؤز موناسیبت لرین
شومالی آزه ربایجان جمهورییه تیله تنظیم ائدیب ، اورانتیسیز تنقید و تهاجومی
ادبیات دان ال چکسینلر. اوردا یاشیان میلتیمیز ده دییشیک آتموسفر و دییشیک نیاز و
بکله نتیلر ایچینده اولدوقلارینا گوره تام اولاراق جنوبو و اونون سورونلاری و
ایمکانلارین تانیمیرلار، بو وضعیتی نظرده آلمیان هم وطن لریمیز شومالا موسافیرت
اتدیک لرینده و یا بیر مولتجی کیمین اورا کوچمه مجبوریتینده قالاندا فرقلی
دویقولار یاشاییب و گاهدان متضاد دوشونجه
لره دوشوب و خیال قیریقلیقینا معروض قالیرلار.
تورکیه جومهوریتیله ایلیشگیلره تاریخی اولاراق
فرقلی دیر. 7 عصره یاخین قونشولوقون ان آز 4 عصری قانلی دویوش و دوشمانچیلیق لا
گچیب ، یئنی تورکیه جومهوریتی یارادیلان تاریخدن بری اؤلکه اولاراق آرخاسین قوجا شرق و اونون قاپیسی آزه ربایجانا چئویریب و اؤزون آوروپا و باتی اؤاولکه لرینه چئویریب دیر. بونا عیلاوه
تورکیه خالقی جنوبی آزه ربایجانین عکسینه موحافیظه کار بیر توپلوم دور. بونلارا
یاخین تاریخ ده یعنی مرحوم پیشه ورینین یاراددیقی میللی حکومتین زامانیندا عیصمت
اینونو دئولتینین چوخ عکسی و دوشمانچیل تاورینی دا عیلاوه اتسه ک قارشیمیزا چیخان
تابلو بیزی داها تمکین لی و احتیاط لی اولماقا چاغیرار. گره کیر میللی حرکت اؤیه
لری و تشکیلات و حیزب لریمیز اؤز موناسیبت لرین داها گرچک چی و رئال تعریف ائدیب و
احساساتا دوشمه دن شومالی آزه ربایجان جومهوریتینین حاکمیه تینه قارشی موخالیف بیر
پارتیا کیمی دئیل بلکه دوست اولاراق ایسته ک و شیکایت لرین حاکمیت له بیر آرایا
قویسون لار. گچمیش ده چوخ تآًسوف لا ، بیز ائلیه بیلمه میشیق بو گرچک لری آنلاییب
و اونا دوغرو تاویر لار سرگیلیه ک. لازیم دیر هر ایکی اؤلکه نین رسمی مقام لارینا
قارشی تام احترام و اونلارا سایقیلی گوروشلر آپاریلسین . بونلار رعایت اولماسا هر
ایکی دئولتین حاکمیتی بیزی پتانسیل اولاراق موخالیف کیمی گوروب و طبیعی اولاراق
پوزیتیو بداورانیش بو دوروم دا چوخ دا گرچه ک سه ل اولمیا جاق دیر.
دیگر دئولت لرله ایلیشگیلر :
بو قونودا "وینیستون چورچیل " گچمیش
اینگلیز سیاست چینین سوزون خاطیرلاتماق گره کیر. دئولت لر (و میللت )لرین دایمی
دوست و یا دوشمان لاری یوخ دور ، ساده جه داییمی منفعت لری واردیر.
بو گرچیی هر زامان گوز اؤنونه آلیب و دیگر دئولت لرله آنلاشیب دوستلوق و یا دوشمانلیق
اتمه لییک .
سوزی بوندان چوخ اوزاتماق ایستمه سه م و
توم مقاله نی بیر، ایکی جومله ده خولاصه اتمه ک ایسته سیدیم دئمه لیدیم : هر تورلو
فاشیستی و دوشمان گولدورن داورانیشدان قاچینمالییق. یاخینلاشیب و هر تورلو تخریبات
دان ال چکیب ، یئنی استراتژی و یوللارلا ، خالقیمیزی موباریزه یه چکیب و خاریجی
ایلیشگیلریمیزی ترمیم اتمه لییک . چوخ ساده دسه م : سسیمیزی یوموشادیب ، بیله ک
له ریمیزی یوغونلاتمالییز.
گله جک بیزیم دیر- تایماز اورمولو
تموز 2012 برابر تیر 1391
هیچ نظری موجود نیست:
ارسال یک نظر