اورمو ایشچیلری :عزیز میللتیمیز!
گونئی
آذربایجاندا باشوئرن دئپرمله بیرداها فارسچی ایران رئژیمی‌نین آذربایجان
تورک‌لرینه قارشی آچیق شکیلده آیریمجی‌لیغی اؤزونو گؤسترمیش اولدو.
چوخ
بؤیوک و ییخیجی اولمایان زلزلنین آجی سونوج‌لاری، ایران رئژیمی‌نین گونئی
آذربایجان تورک‌لرینه قارشی اولان صیفیر ایلگی‌سینی آیدینجاسینا اورتایا
قویدو. بو دوغال فلاکت اوزون‌دن گونئی آذربایجانین یاشام ایستانداردی دونیا
ایجتیمایتینه گؤستریلدی. ایران آدلانان دؤولت طرفین‌دن دونیانین
مئدیاسین‌دان اوزاق توتولماسینا رغمن، اؤزل چکیلیش‌لر و بیلگی‌لر
واسطه‌سیله میللتیمیزین آوارلار آلتیندا یاشاماسی دونیا یاییم مرکزلرین‌دن
یاییلدی. فارسچی رئژیم، دئپرم‌دن ساعت‌لار سونرا، تورکیه و آذربایجان‌دان
اوزانان ایلک یاردیم اللری‌نین گئری ایته‌لمه‌سیله آذربایجان تورک‌لری‌نین
اؤلومون‌دن اوزولممه‌سینی، تسینه سئوینمه‌سینی آیدینجا گؤسترمیش اولدو. اما
بوتون بون‌لارا
باخمایا‌راق آذربایجان تورک میللتی اؤز جان‌لارینی
اونوتمادی و قیسسا زامان ایچینده یاخین‌دان-اوزاق‌دان دئپرم بؤلگه‌سینه
آخیندی. یوخسول-وارلی، کیمین الیندن نه قوپوردو اؤز وطنداش‌لارینا
یئتیرمه‌یه چالیشدی. و بیر بوتون اولدوغونو، میللت اولدوغونو دونیایا ثابت
ائتدی. آذربایجان تورک‌لری بو داورانیش‌لاری ایله آرتیق بیر میللت
آشاماسینا چاتدیغینی و قانایان یاراسینی اؤزو سارماغا حاضر اولدوغونو
گؤسترمیش اولدو.
عزیز میللتیمیز!
آنجاق
قاراباغین یاراسی درین‌دیر. قیش قارشیدا‌دیر. کندلی سویداش‌لاریمیزین ۱۰۰
ده ۱۰۰ یاشامی مال-حیوانا باغلی‌دیر. ائولرله بیرلیکده ییخیلان دام-داوار
دام‌لاری دا تئزلیکله دوزلمه‌لی‌دیر. بیلدیگینیز کیمی بؤیوک اؤلچوده
دام-داوارین آوارلار آلتیندا جان وئرمه‌سیله کندلی سویداش‌لاریمیزین نورمال
یاشام سورمه‌سی اولدوقجا زور دورومدا‌دیر. ان آزین‌دان قالان مال-هئیوانین
سویوق‌دان قورونماسی گرکیر. ائله بو اوزدن‌دیر کی، هله ده قاراداغا قوشماق
و الدن گلنی اسیرگممک گرکیر. بؤلگه‌دن گلن بیلگی‌لره گؤره، فارسچی رئژیمین
وئردیگی ویدلرین هامی‌سی سؤزده قالماقدا‌دیر. آرتیق، ایش او یئره
چاتیب‌دیر کی، آذربایجان عاشورا قوشونونون آلبایی دؤولتین دئپرمله وئردیگی
سؤزلرین یالان اولدوغونو دیله گتیریر. او، دئییر، “قیش گلیر. اهالینی گئچری
مسکون‌لاش‌دیرماق اوچون، دؤولت‌دن کانئکس ایسته ییریک. اونلار ایسه،
“وئررسک فیلانکس راحت‌سیز اولار” دئییرلر بیزه!” گؤروندوگو کیمی، رئژیمین
ایچینده بئله، تورک-فارس آیریسئچگی‌لیگی باش آلیب گئدیر.
عزیز میللتیمیز!
قاراداغین
اوزرینده رئژیم ایچی گیزلی قالان خیردا-بؤیوک حساب‌لار دیرچلرکن دئپرم
وورموش وطنداش‌لاریمیز بیر داها قوربان گئتمه‌یه محکوم اولماقدا‌دیرلار.
داغ‌لیق بؤلگه‌نین سویوغو هئچ ده دئپرم‌دن قالیجی فلاکت دئییل‌دیر. بو
اؤزگه دؤولت‌دن اومود یوخ‌دور. ال-اله، اوموز-اوموزا بیر داها قاراداغین
یارا‌لارینی سارماغا قالخالیم. بو اوزدن، بیز آذربایجان سیاسی تشکیلات‌لاری
اولا‌راق، ایچری‌دن گلن ایستک‌لر دوغرولتوسوندا قارشیمیزداکی هفتنی
“قاراداغ هفته‌سی” اولا‌راق اعلان ائده‌رک:
۱. بوتون آذربایجان تورک‌لرینی بو هفته ایچری‌سینده قاراداغ محلینا گئتمه‌یه و اوراداکی وطنداش‌لاریمیزا دستک اولماغا چاغیریریق.
۲.
بو هفته ایچینده اؤلکه‌دن قیراقدا، دونیانین هاراسیندا یاشاماسین‌دان
آسی‌لی اولمایا‌راق تورکم دین بوتون سویداش‌لاریمیزی قاراداغا مالی دستک
اولما‌لارینی ریجا ائدیریک.
۳.
توپ‌لانان مالی یاردیم‌لارین ایران دؤولتی‌نین بانک‌لارینا وئریلممه‌سی
گرکیر. چونکو بئله اولان حالدا مالی یاردیم‌لارین بانک‌لاردا بؤلوکه
اولماسی و فارسچی دؤولتین خزینه‌سینه وئریلمه‌سی قاچیریلمازدیر.
۴.
توپ‌لاشان مالی یاردیم‌لارین امین اللرده اولماسی اوچون بو بیلدیریشده
ایمضاسی اولان قوروم‌لارین بیریله مصلحت ائدیلمه‌سی دوغرو یول‌لاردان
بیری‌دیر.
- آذربایجان میللی دیرنیش تشکیلاتی (دیرنیش)
- گونئی آذربایجان سوسیال دئموکرات پارتیاسی(گاسدپ)
- گونئی آذربایجان قورتولوش پارتیاسی(گاقپ)
هیچ نظری موجود نیست:
ارسال یک نظر